კახეთის სამხარეო განვითარების ცენტრმა კიდევ ერთი ბავშვთა და მშობელთა განათლებისა და განვითარების ცენტრი გახსნა ახმეტის მუნიციპალიტეტში. 

ბავშვთა და მშობელთა განათლებისა და განვითარების ცენტრში უკვე ხელმისაწვდომია საქართველოს ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროს  ბავშვთა ადრეული განვითარების  ქვეპროგრამა. აღნიშნული პროგრამა მუნიციპალიტეტში მცხოვრებ 0-7 წლამდე განვითარების ეტაპების დაყოვნების ან ამ მხრივ რისკის მქონე ბავშვებისთვის და მათ ოჯახებისთვის შესაბამისი სერვისის მიწოდებას უზრუნველყოფს.  

18 ოქტომბერს  ცენტრის ოფიციალურად გახსნის ღონისძიება ჩატარდა, რომელსაც ესწრებოდნენ ადგილობრივი თვითმმართველობის და ბავშვებთან კავშირიში მყოფი ყველა საჯარო უწყების წარმომადგენლები. ღონისძიებაზე ხაზი გაესვა ცენტრის სერვისების მნიშვნელობას და იმ სამომავლო გეგმებს, რომელიც ახმეტის მუნიციპალიტეტში მცხოვრებ ბავშვებსა და ოჯახებს მხარდაჭერას გაუწევს მრავალფეროვან სერვისებისთან წვდომის მიმართულებით.  აღსანიშნავია, რომ ახმეტაში ამ დრომდე არ იყო არცერთი მხარდამჭერი სერვისი, რომელიც შეზღუდული შესაძლებლობის და სხვადასხვა საჭიროების მქონე ბავშვებს მოემსახურებოდა. 

ბავშვთა და მშობელთა განათლებისა და განვითარების ცენტრის სარეაბილიტაციო სამუშაოები ჩატარდა ახმეტის მუნიციპალიტეტის ფინანსური მხარდაჭერით, ხოლო ცენტრის მატერიალურ-ტექნიკური ბაზის მოწყობა და შინაარსობრივი ნაწილი უზრუნველყო კახეთის სამხარეო განვითარების ცენტრმა.